Алматыда түркі дүниесінің халықаралық поэзия фестивалі өтеді

Ф

естивальдің басты мақсаты – түркі әлемінің бірлігі мен мәдениетін нығайту,

Алматы қаласында 2024 жылғы 26 қыркүйекте түркі әлеміндегі жас ақындардың Халықаралық поэзия фестивалі өтеді. Оған Түркия, Қазақстан, Қырғызстан, Өзбекстан, Әзербайжан және Түрікменстанның ақындары қатысады. Бұл туралы Халықаралық «Түріксой» ұйымының баспасөз қызметі мәлім етті.

Фестивальдің басты мақсаты – түркі әлемінің бірлігі мен мәдениетін нығайту, жас ақындардың шығармашылық көкжиегін кеңейту. Іс-шара ТҮРКСОЙ ұйымының, Алматы қаласы әкімдігі мен «Тұлға-Достық» қоғамдық қорының қолдауымен өтеді.

Фестивальдің ашылуы сағат 11:00-де «Поэзия аллеясында» (Сейріков көшесі, 2а) өтеді.

Ашылу салтанатында ТҮРКСОЙ Бас хатшысы Сұлтан Раев, Түркі мемлекеттері жазушылар одағының төрағасы Ұлықбек Есдәулет, Қазақстан Жазушылар одағы төрағасының орынбасары Қасымхан Бегіманов, Қырғызстан Жазушылар одағының төрағасы Қаныбек Иманалиев, Қазақстанның қоғам қайраткері, «Парасат» және «Достық» ордендерінің иегері Асыл Осман және басқа да зиялы зиялы қауым өкілдері, қоғам қайраткерлері, жазушылар мен меценаттар сөз сөйлейді.

Ал фестивальге қатысушы ақындар сағат 17:00-де «Алатау» дәстүрлі өнер театрының сахнасында (Нұркент ықшамауданы, 6) өнер көрсетеді.

Қатысушылар: Мухиттин Гүмүш (Түркия), Арайлым Мұраталиева (Қазақстан), Дәурен Тілеухан (Қазақстан), Вильям Молотов (Қазақстан), Ерқанат Кеңесбекұлы (Қазақстан), Ырысгүл Изатова (Қырғызстан), Акжол Доранбек уулу (Қырғызстан), Канатбек Таалайбек уулу (Қырғызстан), Шухрат Ариф (Өзбекстан), Мансур Жумаев (Өзбекстан), Хулкар Шерзодова (Өзбекстан), Интигам Яшарұлы (Әзербайжан), Хошгелдиева Махым (Түрікменстан).

Сонымен қатар, фестиваль барысында «Алатау серілері» ансамблі, Бибігүл Қилымхан, Әсет Есжан, Ерден Жақсыбек, сондай-ақ «Алатау» этно-фольклорлық ансамблі сынды қазақстандық танымал өнер ұжымдары мен орындаушылар ән шашуын ұсынады.