2 сәуір – Халықаралық балалар кітабы күні
З
аман озған сайын балалар әдебиеті де түрленіп, жаңғырып келеді
Заман озған сайын балалар әдебиеті де түрленіп, жаңғырып келеді. Жас оқырмандардың да талғамы терең. Классикадан бастап, психологиялық еңбектерді сұрап оқиды, деп жазды 24.kz.
Бүгін Халықаралық балалар кітабы күні. Бұл мереке 1956 жылдан бері атақты дат жазушысы Ганс Христиан Андерсеннің туған күніне орай аталып өтеді. Әйгерім Бақытжанова төртінші сыныпта оқиды. Жас өрен бос уақытын кітапханада өткізгенді жөн көреді. Талғамы да жоғары. Қиял-ғажайып әңгімелерден бөлек, заманауи ақын-жазушылардың еңбегін сүйіп оқиды.
Әйгерім Бақытжанова, оқушы: - Мен кітапханадан ғана емес, дүкендерден де неше түрлі кітаптарды аламын. Үйімде кішкентай кітапхана бөлмем бар.
Кітап оқу балалар арасында сәнге айналған. Елорданың өзінде орталық балалар мен жасөспірімдер кітапханасының 22 филиалы бар. Оқырман аяғы сиреген емес.
Жәмилә Жанарбекқызы, қалалық орталық балалар және жасөспірімдер кітапханасының кітапханашысы: - Оқырмандардың талғамы әртүрлі ғой. Танымдық кітаптарды көп оқитындар бар. Кішкентай болса да, ғылыми кітаптарды, техника туралы оқығанды жақсы көреді. Аударма әдебиеттерді көз іздейді біздің оқырмандар. Десе де классика сұраныстан түскен емес.
Фото: pixabay.com.
Көрген мультфильмі не қандай да бір фильм желісімен жазылған кітаптарды сұрайтындар көп. Бұл да баланың қиялына, көзқарасына әсер ететін дағды. Ал оқыған шығарманы көп болып талдау көкжиекті кеңейтері сөзсіз.
Шұғыла Сұлтан, оқушы: - Кітап оқитын бала мен кітап оқымайтын баланың айырмашылығы өте көп. Мысалы, кішкентай кезінен кітап оқыған балалардың көзі ашық, көп зат біледі. Әлемді сырттан тани алған. Ал кітап оқымаған балаларға сәл-сәл ілесе алмай, бір затты алып кету қиынырақ болады. Қазіргі таңда ҰБТ-ға дайындалып жүргеннен кейін ҰБТ кітаптарын оқимын, негізі Харука Муракамидың кітаптарын оқыған ұнайды.
Қуантарлығы қазақ балаларына арналған шығармалар түрленіп келеді. Әлемдік туындыларды ұлттық ділімізге бейімдеп аудару да жолға қойылған. Ал кітапхана ұжымы бүгінгі мерекеде әр баланы Серікбол Хасан, Мира Сембаева, Зәуре Төрехан, Толымбек Әбдірайымов, Нұрлан Қалқа сияқты ақын-жазушылармен кездестіріп, тілдесуге мүмкіндік жасамақ.